Beint í efni
Skagaströnd.is
↗
Allar myndir
Samgöngur
✕
Skip og Bátar
✕
Flokkur
Annað
Atburðir
Atvinnumál
Fólk
Jóla- og póstkort
Ljósmyndarar
Mannvirki
Náttúra
Miðflokkur
Bílar
1.576 myndir
Flæði
Reitir
Hallgrímur Kristmundsson safn006
Myndin var líklega tekin í Skagafirði (Þórðarhöfði og Málmey í baksýn?) af þremur sjómönnum á spjalli um borð. Mennirnir eru óþekktir og líka hvenær myndi var tekin. Ef þú þekkir mennina vinsamlega sendu okur þá athugasemd.
Árni Geir Ingvarsson - safn 945
Líklega er þetta færeyskur kútter á Íslandsmiðum. Myndina tók Herbert Ólafsson (d.25.4.2007) úti á rúmsjó sennilega einhverntíma kringum 1960.
Árni Geir Ingvarsson - safn 892
Drekkhlaðinn síldarbátur á miðunum 1965 með nótabát við síðuna. Ekki er vitað hvaða bátur þetta er en hann hefur verið GK 430 eða EA 430. Herbert Ólafsson (d.25.4.2007) tók myndina.
Ólafur Bernódusson624
Guðbjartur er einn af fjölmörgum bátum sem gert hafa út frá Skagaströnd gegnum tíðina. 10. október 2007 var hann að fara í línuróður á myrkri nóttu. Á sama tíma var Húnabjörgin, björgunarbátur Landsbjargar á Skagaströnd, að fara í útkall. Þegar Húnabjörgin var við að fara fram úr Guðbjarti, rétt norður af Höfðanum, beygði hann skyndilega á stjórnborð, þvert fyrir Húnabjörgina, sem skall á Guðbjarti af fullum þunga. Afleiðingarnar sjást á þessari mynd því báturinn brotnaði mikið og tæki í stýrishúsinu eyðilögðust. Húnabjörgin skemmdist lítið og gat haldið afram í útkallið eftir að hafa fylgt Guðbjarti til hafnar. Skipstjóri Guðbjarts hafði setið í stólnum, sem var þar sem Húnabjörgin kom á bátinn, niðursokkinn við dýptarmælinn þegar áreksturinn varð. Hann hentist úr stólnum niður á gólf en slapp með skrámur. Á myndinni eru menn að skoða skemmdirnar á Guðbjarti. Frá vinstri: Hallgrímur Jónsson (d.1.4.2013), tveir óþekktir, Hafsteinn Pálsson og Sigurjón Guðbjartsson.
Árni Geir Ingvarsson - safn 930
Bátur kemur til hafnar á Djúpavík hlaðinn fólki. Nafn bátsins er óþekkt en á kinnungnum stendur GK 515. Myndina tók Herbert Ólafsson (d.25.4.2007) líklega kringum 1940.
Ólafur Bernódusson663
Þessi mynd var tekin 28. september 2009 þegar hafist var handa við að rífa Auðbjörgu Hu 6 í dráttarbrautinni á Skagaströnd. Þar hafði Auðbjörg staðið í ellefu ár - frá 1998 - áður en hún loks var rifin. Lýður Hallbertsson til hægri og Árni Geir Ingvarsson til vinstri, standa á malarhaugnum og fylgjast með. Aðrir á myndinni eru óþekktir.
Dagný Sigmarsdóttir - safn 054
Myndin var tekin um borð í Aðalbjörgu Hu 7 á síldveiðum líklega sumarið 1961. Maðurinn á myndinni er Snorri Gíslason (d.29.5.1994).
Dagný Sigmarsdóttir - safn 055
Konan á myndinni er Áslaug Torfadóttir frá Drangsnesi. Hún kom til Skagastrandar sem vinnukona hjá Ole Aamundsen en fór síðan sem kokkur um borð í Aðalbjörgu HU 7. Myndin var líklega tekin í kringum 1960 í óþekktum bát.
Dagný Sigmarsdóttir - safn 056
Ósk Hu 33 á siglingu á grásleppuvertíð. Stefán Stefánsson (d. 2.1.1988) frá Kambakoti átti bátinn og gerði hann út. Á myndinni dregur Óskin litla skektu sem notuð var til að vitja um grásleppunetin. Aflanum var svo landað um borð í Óskina og skorin þar meðan annar maður hélt áfram umvitjunum á skektunni. Maðurinn á dekkinu er annað hvort Bernódus Ólafsson (d.18.9.1996) eða Sigmar Jóhannesson (d.20.4.2000) en þeir voru lengi samstarfmenn Stefáns við grásleppuveiðina.
Jósef H Sigurðsson - safn 033
Aftan á þessari mynd stendur að þetta sé Máni Hu 5 sem var áður Halkion Ve 27. <br>Myndin var líklega tekin þegar Máni kom til Skagastrandar fyrst í september 1960 í eigu Hólaness hf. Hann var svo talinn ónýtur og tekinn af skrá 1965. (Heimild: "Sjósókn frá Skagaströnd & vélbátaskrá 1908 - 2010" eftir Lárus Ægi Guðmundsson)
Árni Geir Ingvarsson - safn 951
Síldarbátar í höfn á Djúpavík. Ekki er vitað hvenær myndin var tekin en sennilega hefur það verið einhverntíma á fimmta áratugnum. Myndina tók Herbert Ólafsson (d.25.4.2007). Báturinn næst okkur ber einkennisstafina SF 58 en nafnið er óþekkt. Á kinnunginn á stálbátnum í baksýn stendur Jörundur. Líklega er það báturinn Jörundur Bjarnason frá Bíldudal.
Árni Geir Ingvarsson - safn 957
Þegar síldarverksmiðjan var reist á Djúpavík 1934 - 1935 var ekki vegasamband þangað því vegur var ekki lagður norður í Árneshrepp fyrr en 1965. Þess vegna var sjórinn í raun þjóðvegurinn þangað og þaðan. Á myndinni má sjá litla trillu, fulla af fólki, líklega á leiðinni frá Kúvíkum inn að Djúpavík. Myndina tók Herbert Ólafsson (d.25.4.2007) líklega kringum 1940.
Dagný Sigmarsdóttir - safn 037
Bræðurnir Sigmar Jóhannesson (d.20.4.2000) til vinstri og Vilberg Jóhannesson (d. 15.11.2002) til hægri við bílskúrinn á Sunnuvegi 2 nýkomnir af hreindýraveiðum og með hausinn af bráðinni í poka.
Árni Geir Ingvarsson - safn 944
Skipið sem liggur við hafnargarðinn á Skagastrandarhöfn - nú Útgarð- er m.s Tungufoss (I) smíðaður fyrir H/f Eimskipafélag Íslands í Danmörku árið 1953. Svokölluð stykkjavöruskip í eigu Eimskipafélagsins, voru og eru almennt höfð svört að lit á skrokk og þannig var Tungufossinn í upphafi. En þar sem skipið var á fyrstu árum sínum mikið í saltfiskflutningum til suðlægari landa, saman ber Miðjarðarhafið og Suður-Ameríku, þá var skipið málað grátt að lit. Hið sama var upp á teningnum varðandi frystiskip í eigu Eimskipafélagsins að þau voru höfð ljós að lit. Myndin gæti verið tekin skömmu fyrir 1960 af Herbert Ólafssyni (d.25.4.2007). Í baksýn sér í annað skip, líklega Arnarfell I, úti á legunni.
Árni Geir Ingvarsson -safn 2 104
Færaveiðar um borð í Ásbjörgu Hu 5 í renniblíðu sumarið 1968. Maðurinn á myndinni er óþekktur.
Árni Geir Ingvarsson -safn 2 40
Örvar Hu 21 var fyrsti frystitogari Íslendinga. Hér er hann í Skagastrandarhöfn utan á Arnari Hu 1 sem var nýrri og, eins og sjá má, miklu stærri frystitogari. Togararnir voru báðir í eigu Skagstrendings hf. Örvar reyndist Skagstrendingi hf mikið happaskip sem skilaði ótrúlegum verðmætum að landi.
Árni Geir Ingvarsson - safn 776
Aflaskipið Arnar Hu 1 nokkru áður en hann var seldur til Akureyrar.
Árni Geir Ingvarsson -safn 2 102
Um borð í mb Sæljóni Re 317 á netaveiðum 1960. Á myndinni er verið að leggja netin og bogni maðurinn er að henda út steinunum jafn óðum. Mennirnir eru óþekktir.
Jón Jónsson 461
Sjómannadagur á köldu vori því sjá má nokkra litla ísjaka í höfninni. Bjarni Loftsson (d.?) er ræðarinn í miðjunni. Næst fremstur er Sigmar Jóhannesson (d.20.4.2000) en fremstur er ?Sveinn Ingólfsson? Aðrir eru óþekktir. Bátarnir í baksýn eru Stígandi Hu 9 til vinstri og Ósk Hu 33 til hægri.
Guðrún Sigurðardóttir - safn 002
Jón Ólafur Ívarsson (d.29.12.2013) skýtur sér fugl í matinn um borð í Auðbjörgu Hu 6 frá Höfðakaupstað (Skagaströnd). Ekki er vitað hvenær myndin var tekin en líklega hefur það verið á sjötta áratugnum.
Ingibergur Guðmundsson 254
Róbert Gunnarsson málar um borð í Arnari Hu 1 sumarið 1989. Róbert var hluti af hópi unglinga sem fengin voru til að ryðberja og mála togarann ofandekks undir verkstjórn fullorðinna.
Árni Geir Ingvarsson - safn 798
Hér á árum áður var olíubirgðastöð á Skagaströnd. Olían kom með skipum eins og Kyndli, sem er á myndinni í höfn á Skagaströnd, og var dælt úr því í tanka sem voru uppi á Höfðanum og austan við hann rétt hjá sundlauginni. Úr þessum tönkum var olían afgreidd á bíl sem flutti hana um bæinn og út um sveitir meðan notast var við olíu við upphitun húsa. Einnig var afgreiðsluslanga niðri á höfn vegna bátanna. Tankarnir eru nú horfnir og öll afgreiðsla á olíu til stórnotenda eins og stórra skipa fer fram með tankbílum. Minni bátar nýta sér olúdælur sem eru staðsettar á enda Smágarðs við Skúffugarðinn.
Guðrún Sigurðardóttir - safn 005
Auðbjörg Hu 6 í slipp á óþekktum stað.
Árni Geir Ingvarsson -safn 2 41
Helga Björg Hu 7 var rækjuveiðiskip sem frysti aflann um borð. Skagtrendingur hf átti skipið í nokkur ár.
Ingibergur Guðmundsson 252
Í bókinni "Sjósókn frá Skagaströnd & Vélbátaskrá 1908 - 2010" eftir Lárus Ægi Guðmundsson segir svo um þennan bát: "Bjarni Helgason Hu 109 1890. Báturinn var smíðaður úr stáli á Ísafirði árið 1988 og var 12 brl. með 218 ha. Caterpillar vél. Hann hét Jón Helgason ÁR 12 þegar Ólafur Ingibjörnsson keypti hann árið 1988 og gerði út þar til báturinn var seldur í maí 1990 til Hornafjarðar". Myndin var líklega tekin 1989 af bátnum í höfn á Skagaströnd.
Jón Jónsson 504
Arnar Hu 1 liggur utan á Örvari Hu 14. Báðir voru þeir togbátar í eigu Skagstrendings hf. Arnar kom til Skagastrandar í janúar 1969 og var seldur aftur 1972. Örvar kom í lok desember 1970 og var svo seldur í maí 1974. Aftan við Örvar sér í Helgu Björg Hu 7, sem var í eigu Útgerðarfélags Höfðakaupstaðar hf. Hún kom til Skagastrandar 1965 og var gerð út þaðan þar til í júní 1971 er hún var seld til keflavíkur. (heimild: "Sjósókn frá Skagaströnd & vélbátaskrá 1908 - 2010" eftir Lárus Ægi Guðmundsson) Myndin var tekin sumarið 1971.
Dagný Sigmarsdóttir - safn 076
Kristján Karlsson um borð í skektu sem notuð var til að vitja um grásleppunet. Í baksýn sést Ósk Hu 33 sem var í eigu Stefáns Stefánssonar (d.2.1.1988) frá Kambakoti. Við Óskina liggur önnur skekta sem líka var notuð við umvitjuna. Í áhöfn Óskar voru þrír menn. Tveir fóru á skektunum til að vitja um gráslepputrossurnar og lönduðu síðan aflanum um borð í Óskina þar sem sá þriðji skar grásleppuna og dró skektuna að næstu trossu. Eins og sjá má var ekki óalgengt að selir slysuðust í netin sem þótti heldur verra því þeir drógu úr veiðgetu netanna sem þeir vöfðu stundum um sig.
Árni Geir Ingvarsson -safn 2 147
Ólafur Magnússon Hu 54 var einn af mörgum bátum með því nafni sem útgerðarfélagið Jökull hf hefur átt. Eigendur Jökuls eru hjónin Stefán Jósefsson skipstjóri og Sigríður Gestsdóttir. Þennan bát keyptu þau 1996 og gerðu út en seldu svo aftur haustið 2006. Ólafur Magnússon var smíðaður 1972 í Garðabæ en lengdur 1973. Þegar hann kom til Skagastrandar var hann 125 brl. að stærð með 750 hestafla Caterpillar vél. (Heimild:"Sjósókn frá Skagaströnd & Vélbátaskrá 1908 - 2010", eftir Lárus Ægi Guðmundsson).
Dagný Sigmarsdóttir - safn 083
Guðrún Angantýsdóttir situr aftast í skektunni. Börnin eru Jón Hilmar Indriðason til vinstri og Hjalti Hólmar Indriðason til hægri. Maðurinn lengst til vinstri er Indriði Hjaltason (d.2.4.2006), maður Guðrúnar og faðir Þeirra bræðra.
Héraðsskjalasafn A-Hún 352
Ms Stellgeth T-88-1 var norskt selveiðiskip sem sótti til veiða norður í íshaf. Í áhöfn þessa skips var Jóhann D. Baldvinsson (d.9.4.1990) frá Skagaströnd og er myndin frá honum komin. Myndin var tekin 1929 og eins og sjá má er Sellgeth inni í miðri ísbreiðunni og karlarnir komnir út á ísinn í leit að selum. Jóhann, eða Jói norski eins og hann var gjarnan kallaður, fór sextán selveiðiferðir norður í ísinn með norðmönnum á fyrri hluta tuttugustu aldar.
Árni Geir Ingvarsson - safn 967
Herbert Ólafsson (d.25.4.2007) tók þessa mynd á Reykjarfirði en ekki er vitað hvenær hún var tekin. Báturinn á myndinni er óþekktur en á skiltinu á stýrishúsinu má lesa að hann var frá Höfðakaupstað. Ef þú veist hvaða bátur þetta var vinsamlega sendu okkur þá athugasemd.
Árni Geir Ingvarsson - safn 2 28
Arnar Hu 1 var upphafið að ævintýrinu Skagstrendingur hf. Arnar var keyptur til Skagastrandar 1968 eftir stofnun félagsins. Vöxtur Skagstrendings hf varð mjög hraður á næstu áratugum. Fisk Seafood keypti svo allar eigur félagsins og flutti megin hluta starfsemi þess á Sauðárkrók.
Árni Geir Ingvarsson - safn 943
Þrímastra skúta kemur til hafnar á Djúpavík. Herbert Ólafsson (d.25.4.2007) tók myndina líklega einhverntíma kringum 1940.
Guðrún Sigurðardóttir - safn 015
Auðbjörg Hu 6 í slipp á óþekktum stað.
Árni Geir Ingvarsson - safn 769
Stefán Jósefsson í sínu eðlilega umhverfi um borð í bát sínum Ólafi Magnússyni Hu 54 að gera klárt fyrir grásleppuveiðarnar.
Árni Geir Ingvarsson - safn 2 12
Tveir gamlir bátar í höfninni á Skagaströnd. Gauti Hu 59 til vinstri smíðaður 1963 og Arnarborg Hu 11 til hægri smíðuð 1958. Örlög þessara báta urðu ólík. Gauti var endurbyggður og fékk aftur sitt gamla nafn Húni II og þjónar nú sem glæsilegur skóla- og hvalskoðunarbátur á Akureyri, þar sem hann var byggður á sínum tíma. Arnborgin endaði aftur á móti á áramótabrennu á Skagaströnd 1993 eftir úreldingu. (Heimild: "Sjósókn frá Skagaströnd & Vélbátaskrá 1908 -2010" eftir Lárus Ægi Guðmundsson)
Dagný Sigmarsdóttir - safn 049
Indriði Hjaltason (d.2.4.2006) landar grásleppum um borð í Ósk Hu 33 þar sem Stefán Stefánsson (d. 2.1.1988) tók við þeim og skar. Óskin dróg skektuna sem Indriði fór svo um borð í og vitjaði um netin. Aflanum var síðan skilað um borð í Óskina þar sem Stefán skar grásleppurnar meðan Indriði hinir fór í næstu trossu.
Adolf H Berndsen - safn 043
Þessi mynd var tekin 1925. Bryggjan á myndinni var staðsett rétt austan við Hólsnefið, sem er syðsti endi Spákonufellshöfða. Hún var byggð 1922 með 130 dagsverka vinnuframlagi sjómanna á Skagaströnd en Verslunarfélag Vindhælinga fjármagnaði verkið að öðru leiti. Bryggjan var hlaðin úr grjóti, um 40 metra löng og fimm til átta metra breið. Fremst var svo grjótfyllt timburverk. Hlaðni hlutinn var með steyptu plani eins og sjá má á myndinni. Bryggjan kostaði um 80 þúsund krónur á sínum tíma sem þóttu miklir peningar. Lengst af gekk hún undir nafninu Litla bryggjan manna á meðal. Á þessari mynd er aðgerð í gangi en mennirnir á henni eru óþekktir.
Adolf H Berndsen - safn088
Myndin var tekin yfir höfnina á Skagaströnd einhverntíma á árunum rétt fyrir 1940. Stóra húsið á myndinni er kaupfélagið og verslunarstjórahúsið hægra megin við það. Á höfninni stendur Hafnarhúsið sem byggt var 1935 en síðan flutt á núverandi stað 1944 eða 1945. Ljósa húsið til vinstri var gamla búðin og ef grannt er skoðað má sjá að verið er að smíða ker í kerjaslippnum við Bjarmanes á Hólanesinu. Fyrsta kerið sem þar var smíðað var sjósett 1938 en ekki er vitað hvort þetta er það ker eða einhvert þeirra sem á eftir komu.
Árni Geir Ingvarsson - safn 894
Catalina flugbátur frá Flugfélagi Íslands á Reykjarfirði syðri. Slíkar vélar þóttu hentugar þar sem ekki var búið að búa til flugvelli. Myndina tók Herbert Ólafsson (d. 25.4.2007) líklega einhverntíma kringum 1950 því flugvélin kom til landsins 1947 eða 1948.
Dagný Sigmarsdóttir - safn 043
Stefán Stefánsson (d. 2.1.1988) frá Kambakoti sker grásleppu um borð í bát sínum Ósk Hu 33. Stefán gerði Óskina út á grásleppu margar vertíðir og þá gjarnan í samvinnu við Sigmar Jóhannesson (d.20.4.2000) og Bernódus Ólafsson (d.18.9.1996) eða Indriða Hjaltason (d. 2.4.2006). Drógu þeir tvær skektur á Óskinni sem karlarnir fóru svo um borð í og vitjuðu um netin. Aflanum var síðan skilað um borð í Óskina þar sem Stefán skar grásleppurnar meðan hinir fóru í næstu trossur.
Dagný Sigmarsdóttir - safn 053
Aðalbjörg Hu 7 á landleið með fullfermi af síld sumarið 1961. Nótabáturinn með síldarnótinni innanborðs flýtur við hlið bátsins. Ofan á borðstokkana hafa verið settar upphækkanir, "merar", til að koma fyrir meiri síld á dekkinu.
Árni Geir Ingvarsson - safn 982
Maðurinn á myndinni er Benedikt Ágústsson (d.25.9.2016) aflaskipstjóri frá Hvalsá í Steingrímsfirði. Herbert Ólafsson (d. 25.4.2007) tók myndina.
Adolf H Berndsen - safn069
Ernst Berndsen (d. 21.8.1983) á bryggjunni. Ernst átti oft erindi á bryggjuna því hann var lóðs í Húnaflóa og lóðsaði stór skip inn á hafnirnar í flóanum. Einnig sá hann lengi um skipaafgreiðsluna á Skagströnd og þurfti oft að vera á höfninni þess vegna. Maðurinn bak við Ensa er líklega sonur hans Adolf J. Berndsen en drengurinn til hægri er óþekktur. Myndin var líklega tekin kringum 1960.
Adolf H Berndsen - safn087
Útgerðarfélagið Skagstrendingur hf var stofnað haustið 1968. Arnar Hu 1, á myndinni, var fyrsta skip útgerðarinnar og reyndist afar vel. Á þessari mynd er hann nýkomin í heimahöfn á Skagaströnd og því enn með gömlu einkennisstafi sína: ÁR 55.
Ólafur Bernódusson 688
Í mars 2008 fékk hafrannsóknarskipið Bjarni Sæmundsson RE 30 tundurdufl í trollið þar sem það var við fiskirannsóknir á Húnaflóa. Bjarni kom til hafnar á Skagaströnd þar sem duflið var tekið af tveimur starfsmönnum Landhelgisgæslunnar sem eyddu því með sprengingu. Á þessari mynd er björgunarskipið Húnabjörg að koma til hafnar eftir að hafa skutlað gæslumönnunum tveimur um borð í Bjarna. Á myndinni eru fremst, frá vinstri: Kristján Pétur Guðjónsson, Guðmundur J. Björnsson, Reynir Lýðsson og Stefán Sveinsson. Uppi á stjórnpallinum eru, frá vinstri: Ágúst Ómarsson skipstjóri, Höskuldur Erlingsson lögreglumaður og Bjarni Ottósson.
Dagný Sigmarsdóttir - safn 051
Húni Hu 1 með fullfermi af síld í höfninni á Skagaströnd, líklega kringum 1960. Maðurinn til hægri í dökku peysunni með húfuna er Gunnar Sveinsson og hægra megin við hann er Ómar Þorbjörnsson frá Akurgerði. Maðurinn til vinstri er óþekktur.
Árni Geir Ingvarsson -safn 2 118
Myndin var tekin þegar Arnar Hu 1 kom í heimahöfn 15. október 1973 eftir siglingu frá Japan, þar sem hann var smíðaður. Fólki var boðið um borð að skoða og þiggja veitingar. Lengst til vinstri má þekkja Gissur Jóhannsson með sítt hár og framan við hann er lítill frændi hans, Arnar Arnarsson. Ingvar Sigtryggsson (d.10.7.1988) er í dökkum jakka og hvítri rúllukragapeysu en framan við hann, í smekkbuxum, er sonur hans Þórarinn Brynjar Ingvarsson. Til hægri er Anna H. Aspar (d.1.9.1999) og horfir út úr myndinni til hægri. Aðrir eru óþekktir.
Árni Geir Ingvarsson - safn 955
Brúarfos í höfn á Djúpavík. Myndina tók Herbert Ólafsson (d.25.4.2007) líklega einhverntíma kringum 1940. Á netsíðunni: http://fragtskip.123.is/blog/2015/02/05/bruarfoss-i/ segir meðal annars um þetta skip: "BRÚARFOSS I var fyrsta skipið sem kom frá útlöndum eftir að WW2 skall á Hann kom til Reykjavíkur þ 14 sept 1939 með fullfermi af vörum og um 100 farþega.Meðal farþega voru knattspyrnumenn sem höfðu farið til Þýskalands í keppnisferðalag Skipið var mikið happaskip Sigldi áfallalítið WW 2 Og áhöfn hans varð þeirri ánægju aðnjótandi að takast að bjarga yfir 70 manns af sökkvandi skipum".
Ingibergur Guðmundsson 149
Skemmtisigling á sjómannadegi er ómissandi hluti hátíðahaldanna á Skagaströnd og nýtur alltaf mikilla vinsælda. Hér kemur Ólafur Magnússon Hu 54 úr einni slíkri siglingu í renniblíðu með fullan bát af glöðu fólki. Myndina tók Ingibergur Guðmundsson á sjómannadaginn árið 2000.
Árni Geir Ingvarsson -safn 2 180
Á myndinni eru hafnar framkvæmdir við nýjan viðlegukant - Sægarð - í höfninni á Skagaströnd haustið 1990. Jafnframt sést á myndinni að verið er að skipa út frystum afurðum annað hvort rækju eða fiski í skip sem liggur við Útgarð.
Guðrún Sigurðardóttir - safn 010
Sigurður Árnason (d.26.3.2013) tekur lagið á harmoniku um borð í Auðbjörgu Hu 6. Ekki er vitað hvenær myndin var tekin en líklega hefur það verið á sjötta áratugnum.
Árni Geir Ingvarsson -safn 2 105
Þrír menn á útkíkki uppi á stýrishúsinu á Sæljóninu RE 317 í svarta þoku sumarið 1960.
Dagný Sigmarsdóttir - safn 060
Þórir GK 116 í slippnum á Skagaströnd. Þórir var stærsti plastbátur sem var á Íslandi, skrokkurinn fluttur inn frá Frakklandi en báturinn síðan fullgerður hjá Mánavör hf á Skagaströnd. Vörubílinn á myndinni var í eigu Sigurjóns Ástmarssonar. <br>
Jón Jónsson 503
Örvar Hu 14 að koma í höfn á Skagaströnd sumarið 1971. Tvö af rörunum, sem sjást á myndinni, lágu frá höfninni og upp á Höfða í olíutanka sem þar voru frá olíufélögunum Shell (Skeljungur) og BP (Olís). Hin tvö lágu svo í stóru tankana tvo upp við Höfða, norðan við frystihúsið. Skúrarnir sem glittir í á myndinni voru útgerðar- og beitningaskúrar.
Hjördís Sigurðardóttir - safn082
Þessi mynd var tekin við komu nýsmíðarinnar Arnars Hu 1 frá Japan 15. október 1973. Á henni spjallar Adolf J. Berndsen (d.27.8.2018) til vinstri við Pálma Jónsson (d.9.7.2017) alþingismann frá Akri og konu hans Aðalbjörgu Helgu Sigfúsdóttur.
Guðrún Sigurðardóttir - safn 012
Gylfi Sigurðson frá Þórsmörk heldur kátur á lúðu um borð í Aðalbjörg Hu 7. Í brúarglugganum er skipstjórinn, Þórhallur Árnason (d.4.2.2008). Á þessum bát voru þeir hætt komnir ásamt fleirum eitt sinn í línuróðri á Skagagrunni. Leki kom að bátnum þannig að vélarúmið hálf fylltist af sjó. Betur fór þó en á horfðist því þegar drepið var á vélinni hætti lekinn því það hafði farið sundur slanga þannig að vélin dældi kælivatninu út í vélarúmið í stað þess að dæla því út. Eftir að gert hafði verið við slönguna var vélin sett í gang, báturinn lensaður og róðurinn kláraður.
Dagný Sigmarsdóttir - safn 082
Tvíburasysturnar Guðrún Angantýsdóttir til vinstri og Sigurbjörg Angantýsdóttir (d.10.9.1997) um borð í Ósk Hu 33 á grásleppuveiðum. Þær systur hafa fengið að fljóta með því karlarnir þeirra voru í áhöfn Óskar við þriðja mann.
Ólafur Bernódusson 695
Karl Olsen um borð í Öldunni Hu 112 bíður eftir króknum í löndun eftir góðan línuróður 26. mars 2013.
Dagný Sigmarsdóttir - safn 074
Jóhanna Bára Hallgrímsdóttir og Kristján Karlsson um borð í skektu sem notuð var til að vitja um grásleppunet. Í baksýn sést Ósk Hu 33 sem var í eigu Stefáns Stefánssonar (d.2.1.1988). Við Óskina liggur önnur skekta sem líka var notuð við umvitjuna. Í áhöfn Óskar voru þrír menn. Tveir fóru á skektunum til að vitja um gráslepputrossurnar og lönduðu síðan aflanum um borð í Óskina þar sem sá þriðji skar grásleppuna og dró skektuna að næstu trossu. Eins og sjá má var ekki óalgengt að selir slysuðust í netin sem þótti heldur verra því þeir drógu úr veiðgetu netanna sem þeir vöfðu stundum um sig.
1
…
12
13
14
…
27
Leita í myndasafninu
Leita